🔒 سياسة الخصوصية

آخر تحديث: 2026-11-12

بياناتك أمانة معانا. بنجمع اللي محتاجينه بس عشان نوصّلك طلبك، وعمرنا ما بنبيعها لحد.

بنجمع إيه؟

1. العميل: اسمك، وإيميل الدخول، ورقم موبايلك، وعنوانك في الكمبوند (المبنى والدور والشقة)، وصورة الحساب لو حطيت واحدة.
2. طلباتك ورصيدك ونقاطك وطلبات الشحن والخدمات المالية، وتقييماتك وبلاغاتك.
3. صورة الروشتة لو بعتها: دي بيانات صحية، فبتوصل للصيدلي الشريك بس عشان يرد عليك.
4. المندوب: بياناته اللي بيسجّلها مع الإدارة (ومنها الرقم القومي والمستندات)، ومهامه وعهدته ومحفظته.
5. الشريك: بيانات المحل وصاحبه والكاشيرز، والطلبات والتسويات.
6. كود الجهاز للإشعارات لو وافقت عليها.

بنستخدمها في إيه؟

1. نوصّلك طلبك ونتابعه معاك، ونحسب رصيدك ونقاطك.
2. نبعتلك إشعارات المهم بس (المندوب وصل، حالة الطلب، الرصيد).
3. نحل أي مشكلة أو بلاغ، ونحمي الحسابات من النصب.
4. مش بنبعت إعلانات تسويقية من غير ما توافق.

مين بيشوفها؟

1. الشريك (المحل) بيشوف الأصناف اللي طلبتها بس، والتواصل بيعدّي من خلال FAVO.
2. المندوب بيشوف اسمك ورقمك وعنوانك وقت توصيل طلبك بس.
3. فريق FAVO حسب شغل كل واحد (مثلاً: موظف الشحن بيشوف طلبات الشحن بس).
4. الجهات الرسمية لو القانون طلب كده.

بتتخزّن فين؟

على خوادم سحابية مؤمّنة (Supabase)، والاتصال كله مشفّر. نقل البيانات وتخزينها برّه مصر بيتم حسب قانون حماية البيانات الشخصية رقم 151 لسنة 2020 ولائحته التنفيذية.

بنحتفظ بيها لحد إمتى؟

طول ما حسابك شغّال. لو مسحت حسابك، بياناتك الشخصية بتتمسح بعد 14 يوم. سجلات الطلبات والفلوس بتفضل من غير اسمك ولا رقمك ولا عنوانك، للمدة اللي القانون والضرايب بيطلبوها.

حقوقك

1. تعرف بياناتك: «حسابي ← الخصوصية وبياناتك ← حمّل نسخة من بياناتي».
2. تصلّحها: «حسابي ← تعديل البيانات».
3. تمسحها: «حسابي ← الخصوصية وبياناتك ← امسح حسابي». المندوب والشريك بيطلبوا المسح من التطبيق، والإدارة بتقفل العهدة أو التسويات الأول.
4. تسحب موافقتك على الإشعارات في أي وقت من إعدادات الموبايل.
5. تشتكي لـ FAVO من «كلّمنا»، أو لمركز حماية البيانات الشخصية.

لو حصل تسريب لا قدّر الله

بنبلّغ مركز حماية البيانات الشخصية خلال 72 ساعة، وبنبلّغ أصحاب البيانات اللي اتأثرت خلال 3 أيام عمل، وبنقولهم يعملوا إيه.

الأطفال

FAVO للكبار (18 سنة وأكتر). لو عرفنا إن حساب لطفل من غير موافقة ولي أمره، بنقفله.

للتواصل بخصوص بياناتك: privacy@favo.app